سفارت چین در دوشنبه، پایتخت تاجیکستان، روز جمعه گفت که یک حملهٔ مسلحانه سه شهروند چینی را در تاجیکستان، در مرز این کشور با افغانستان، کشت.
سفارت افزود که یک شهروند چینی نیز در این حمله که روز چهارشنبه در ولایت ختلان در جنوبغرب رخ داد، زخمی شد و از شهروندان خواست تا مناطق مرزی را ترک کنند.
این سفارت عاملان را مشخص نکرد، اما گفت که چین خواستار آن شده است که تاجیکستان در این مورد تحقیق کند.
وزارت امور خارجهٔ تاجیکستان در بیانیهای روز پنجشنبه گفت که هر سه کشته کارمند یک شرکت به نام «LLC Shahin SM» بودند که هدف حمله قرار گرفت.
این وزارت افزود که حمله، که از خاک افغانستان راه اندازی شده بود، با استفاده از یک طیاره بدون سرنشین صورت گرفته است.
در بیانیهای، وزارت امور خارجهٔ افغانستان گفت: «حلقهای که در این رویداد دخیل است کسانی اند که تلاش می کنند در منطقه آشوب، بی ثباتی و بی اعتمادی ایجاد کنند»، اما گروهی خاص را مشخص نکرد.
این وزارت افزود که ادارهٔ کابل ارزیابی اولیه انجام داده و با تاجیکستان به طور کامل همکاری خواهد کرد.
